<< Home Page | Steinhowel Index

Aesop's Fables: Steinhowel

5.7. De lupo et asino
(Perry 696)

[See an illustration from a 1501 edition.]

Fabula vii de lupo et asino.

Consilium eius non debet facile quis credere, cui mala vult inferre. De hoc audi fabulam. Lupus obviabit asino, qui ait: O frater asine, famem habeo. Et ideo, inquit, comedam te. Cui asinus: Ut placuerit, ita facies. Nam tuum est imperare, et mihi est voluntati tue obtemperare. Si enim me comederis ex magno labore me liberabis. Ego enim ex torculari vinum, ex area annonam, ex silva lignum, ex montibus lapides ad domos construendos deffero, et ad molendinum annonam fero et iternum refero et ut breviter concludam, omnis labor et omne onus super me est. Ideoque ve diei, in qua natus sum, sed oro, ut de hac una re exaudias me. Nolo ut in via comedas me, quia timeo verecundiam, si enim hic comederis me videntibus vicinis ac dominis meis, dicent: Quomodo asellus noster laxavit se vorari a lupo? Rogo itaque, ut audias meum consilium. Eamus in silvam et faciamus ex viridibus lignis robustas retortas! Et tu liga me per pectus quasi servuum tuum, et ego ligabo te per collum quasi dominum ducentem servum, et ita perduc me ad inferiora silve et ibi comede me pacifice et suaviter. Ad hec lupus non agnoscens dolum ait: Ut dicis ita faciamus, sic abierunt et fortissimas retortas fecerunt, lupus torquebat et asinus apponebat, lupus ligavit asinum per pectus et asinus lupum fortiter per collum. Tunc asinus ait: Eamus inquit, ubi vis. Et lupus ait: Ostende, inquit, tu viam. Ad hec asinus: Libenter faciam. Tunc cepit ire asinus ad domum domini sui, at lupus ut vidit vicum dixit: Non, inquit, per viam pergimus rectam, asinus respondit: Noli hoc, domine, dicere; nam si placet tibi recta est via. Lupus ut agnovit fraudem, cepit retrogradare, at asinus violenter trahere usque ad fores domini sui. Exiens autem dominus ac tota familia percusserunt fere lupum usque ad mortem, unus autem volens percutere lupum in cerebro cum securi, incidit vinculum, et ita solutus lupus fugam petiit in montem. Asinus autem introivit in atrium domni sui. Tunc turbatus asinus pre timore, quem habuerat et pre gaudio, quod habebat, cepit magnas voces emittere. Lupus autem stans in monte, econtra dicebat: Certe non tantum follias ut amplius me colligas. Docet hec fabula, nec facile credamus, cui mala ingerere desideramus, ac semel decepti, fortiter nos postea prevideamus.