Aesop's Fables: Steinhowel
5.6. De lupo et hirco
(Perry 695)
[See an illustration from a 1501 edition.]
Fabula vi de lupo et hirco.
Frequenter contra fortes et potentes surgunt infirmi et pauperes. Unde
audi fabulam. Lupus insequebatur hircum caprarum, ut eum caperet, at
ille subiit in rupem altam et ibi tutatus est. At lupus obsedit eum a
radice. Post beduum autem sive triduum cum lupus sustineret famem, et
hircus sitim discesserunt utrique, lupus prior ut cibum caperet, hircus
vero postea ut aquam potaret. Cum autem usque ad satietatem potasset,
aspiciens umbram suam in aqua dixit: Quam acceptas tibias, et quam pulcram
barbam, et quam magna cornua habeo, et lupus me fugat. Ammodo ergo resistam
ei, et nullam ei dabo potentiam ex me. Lupus autem silenter retro eum
auscultabat omnia verba hec. Infigens autem fortiter dentes in hirci
coxam dixit: Quic hoc est, quod loqueris, frater hirce? Hircus autem
ut sensit se captum, ait: O domine meus lupe, misericordiam, agnosco
culpam. Quia hircus postquam potat, quod non debet, parabolat. Ast lupus
non pepercit, sed vorat illum. Monet autem hec fabula infirmos ac pauperes,
ne insurgant ultra vires contra fortes ac potentes.
Steinhowels Asop, ed. Hermann Osterley (1873). Some of these fables have digitized text; others have only page images. The digital page images are from Google Books. You can also consult the illustrated 1501 edition of Steinhowel's Aesop. Note that Book 7 contains poems from Avianus, so there is no text or page image for the fables in Book 7. |