<< Home Page | Walter Index

Aesop's Fables: Walter of England

Fable 46. De lupo et vulpe.

Perry 568

Ditat preda lupum; ducit lupus otia longo
Fausta cibo. Vulpes invidet, ista movet:
"Frater, ave. Miror cur tanto tempore mecum
Non fueris; nequeo non memor esse tui."
Ille refert: "Pro me vigilet tua cura, precari
Numina non cesses, ne mea vita ruat.
Fraude tamen munita venis falsoque venenum
Melle tegis. Dolor est copia nostra tibi.
Extorquere paras aliquid furtumque minaris,
Sed mea furtivam respuit esca gulam."
Spreta redit; spretam stimulat dolor; apta dolori
Fraus subit: ad pecorum transvolat illa ducem.
Hunc monet his verbis: "Tua gratia muneris instar
Sit mihi, namque lupum dat mea cura tibi.
Hostem perde tuum: tuto iacet hostis in antro."
Vir favet: antra petit, hic necat ense lupum.
Ista lupi cunsumit opes, sed floret ad horam
Vita nocens. Vulpes, casse retenta, gemit:
"Cur nocui? Nocet ecce mihi nocuisse nocivo.
Iure cado, cuius concidit arte lupus."
Vivere de rapto vitam rapit: invidus, instans
Alterius damnis, in sua damna redit. 


Text as published in Boldrini, Sandro. Uomini e bestie: le favole dell Aesopus latinus. Lecce: Argo, 1994.