<< Home Page | Walter Index

Aesop's Fables: Walter of England

Fable 42. De leone et equo.

Perry 187

Tondet equus pratum, petit hunc leo. Causa leonem
Hec movet, ut fiat esca leonis equus.
Inquit equo: "Mi frater, ave, fruor arte medendi,
Et comes et medicus sum tibi." Paret equus:
Sentit enim fraudes et fraudi fraude resistit.
Mente prius texens retia fraudis, ait:
"Quesitus placitusque venis, te temporis offert
Gratia, te rogitat pes mihi sente gravis."
Hic favet, instat equo; subiecto vertice calcem
Inprimit et sopit membra leonis equus.
Vix fugit ille sopor, vix audet vita reverti,
Vix leo, colla movens, respicit. Hostis abest.
Se leo sic damnat: "Patior pro crimine penam:
Nam gessi speciem pacis et hostis eram."
Quod non es, non esse velis; quod es, esse fatere:
Est male quod non est, qui negat esse quod est.