<< Home Page | Walter Index

Aesop's Fables: Walter of England

Fable 41. De pastore et leone.

Perry 563

Sollicitus prede currit leo; spina leonem
Vulnerat; offendit, in pede mersa, pedem.
Fit mora de cursu: levitas improvida lapsum
Sepe facit; leso stat pede turba pedum.
Vix egrum sinit ire dolor saniemque fatetur;
Maior idem loquitur vulneris ipse dolor.
Cum ledit miseros, fortuna medetur eisdem:
Hoc est cur medicum plaga leonis habet.
Nam leo pastorem reperit, pastorque leoni
Pro dape tendit oves. Respuit ille dapes;
Supplicat et plagam tenso pede monstrat et illi
Orat opem; pastor vulnera solvit acu.
Exit cum sanie dolor et res causa doloris;
Hic blando medicam circuit ore manum,
Sospes abit meritique notas in corde sigillat.
Tempore deleri gratia firma nequi.
Hic leo vincla subit. Romane gloria prede
Hunc habet et multas miscet arena feras.
Ecce necis penam pastori culpa propinat:
Clauditur in mediis et datur esca feris.
Hunc leo presentit, petit hunc. Timet ille; timenti
Hec fera blanditur; sperat, abitque timor.
Nil feritatis habens, ludit fera, cauda resultat.
Dum fera mansuescit se negat esse feram.
Hunc tenet, hunc lingit pensatque salute salutem:
Nulla sinit fieri vulnera, nulla facit.
Roma stupet parcitque viro parcitque leoni.
Hic redit in silvas et redit ille domum.
Non debet meritum turpis delere vetustas:
Accepti memores nos decet esse boni.