Aesop's Fables: Walter of England
Fable 20. De hirundine aves monente.
Perry 039
Ut linum pariat de lini semine, semen
Nutrit humus, sed aves tangit hirundo metu:
"Hic ager, hoc semen nobis mala vincla minatur;
Vellite pro nostris semina sparsa malis."
Turba fugit sanos monitus vanosque timores
Arguit; exit humo semen et herba viret.
Rursus hirundo monet instare pericula; rident
Rursus aves. Hominem placat hirundo sibi
Cumque viris habitans cantu blanditur amico:
Nam previsa minus ledere tela solent.
Iam metitur linum, iam fiunt retia, iam vir
Fallit aves, iam se conscia culpat avis.
Utile consilium qui spernit, inutile sumit;
Qui nimis est tutus, retis iure subit.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |