<< Home Page | Rom. Nil. Metricae Index

Aesop's Fables: Romuli Nilantis Fabulae Metricae

37. de grege ovium et latrone pastore (p. 704 in Hervieux; Perry)

Sophe, tuum prudens uicinum iure tuere.
Ast soboles lepidis hiscit hic terrea labris,
Quod grex lanigerum dudum de more bidentum,
Dulcia florigeris decerpens gramina campis,
Raptorem cupidis tendentem gressibus arua
Conspexit recto toruum ad se calle uenire;
Balantumque gregis medio stans uultibus atrox,
Berbicem rapuit predator cornibus unum.
Illius excussit collum mucrone creunto.
Hec ouium presens bardum cum cerneret agmen,
Pro tali causa duro nec corde dolebat,
Aligero pauidum currens aut crure fugebat,
Bellauit duris pugnans nec cornibus audax.
Tunc raptor tacitis gaudens iam fatibus inquit :
Abnegat ast istas quis me mactare bidentes,
Nulla ouis, indignans animo, quod turbida constat,
Stirpe suum truncaui si mucrone propinquum?
Incepit miseras mactans brutasque necare;
Ast unam tollens unam post miserat orco.
Lanigere inter se cernentes ore ferebant :
Non mihi, seuue tibi, ille instat, nunc maxima cura.
Quam iam nostros proprios non lederit artus,
Tamdiu non debemus iam pugnare feroci :
Pacifica hinc forsan prestabit corda nefandus.
Sed raptorque gregem mactans sic ordine totum,
Vt nil lanigeris mansit de milibus amplis
Ni carpens aries fenum tunc corniger unus,
Predator rapiens illum per colla redacta,
[V]eridicisque gregis balans uir faucibus infert :
Vindictam patimur solo nam rite ferente
Nos omnes, digne ac iuste, pro crimine nostro;
Perdere berbicem iam te cum uidimus unum
Primitus ex gregibus nostris, te tempore tali
Possemus nostro toruum quod more necare
Nostrorum duris capitum cum pulsibus altis.
Sic mala non multis aliorum dampna nocebunt,
Quamdiu non illos ledunt infausta nefandos.