<< Home Page | Rom. Nil. Metricae Index

Aesop's Fables: Romuli Nilantis Fabulae Metricae

16. de hirundine et ceteris avibus (p. 670 in Hervieux; Perry 039)

Nemo agilis spernat sapientes dogmata uera.
Hic rumor tangit aures sermone uetusto :
Cum uolucrum omnigene cernebant agmina penne
Tellurem scindique, seri, post, semina lini,
Infausti trepidantque mali nil surgere sero,
Densa seges lini latis si cresceret agris.
Tunc prodens auibus dicebat garrula hirundo,
Lucifluo cernens uenturam pectore pestem :
Cernitis, o uolucres, segetem aut hanc cassibus aptam
Mortiferis lini glaci uel retibus ullis,
Aucepsque stolidis cupit audax tendere nobis,
Si re(ge)s autumno crescens hec creuerit orto.
Quam propter mente hec mea carpite dicta sagaci,
Consilioque meo sensus nunc ferte salubri.
Tendamus cupidis uolucres nos gressibus omnes;
Germina perdamus lini nunc stirpe nociua;
Perdita permaneant ut semper diruta sintque;
Capture fuerint nostre sic retia nulla
Bina aut fundibule torto retinacula filo,
Interdum trucidamur quis cum caute rep ulso;
Sed fuerit requies nobis ac uita secunda,
Taliter si toto exting[u]emus semine lignum.
Consilia ast auibus cunctis ridentibus ista,
Calcabant stolide ac volucres cum dogma salubre,
Tunc sapiens animis in se cogitabat hyrundo :
Aptius en mihi quid nunc uel felicius extat
Plumigeras tales quam nunc dimittere turmas,
Humanam ad stirpem ac verti, ut iam federa firmem,
Cumque illa pangam pacem per secula semper.
Vitam inter homines agit, ac, sic pace peracta,
Quamdiu purpureo glescunt iam gramine pura,
Quamdiu siderei ignescit sol culmina celi,
Tamdiu penniger ac nobiscum uiuit hyrundo.
Post titan niuee flectens ad frigora brume,
Quam tignis nidum ac fetum deponit adultum,
Annoso fuscas querit tum iure latebras
Bis ternisque lunis se ex ordine miro.
At uero humane tendunt iam retia turbe
Al(l)igeris auibus penneque cohartatibus omnis.
Aere tranantes capiunt sic casse phalanges,
Ac captes orto tradunt per retia lini;
Penitet atque illas spernentes dicta docentis.
Ast stulti sophos calcant sic iure magistros;
Illorum mordent stolidas, sunt, tedia mentes.