<< Home Page | Odo Index

Aesop's Fables and Other Parables: Odo of Cheriton

32. DE APE ET SCRABONE.
Perry

Contra carnaliter sapientes.
Apes semel inuitauerunt Scrabones ad prandium. Venerunt Scrabones, et mensa posita apposuerunt Apes mel et fauum. Scrabones parum comederunt et auolauerunt. Iterum Scrabones inuitauerunt Apes; mensa posita apposuerunt Apibus fimum boum. Apes noluerunt gustare et recesserunt.
Apes sunt doctores ecclesie, uiri contemplatiui, qui inuitant impios et apponunt fauum mellis, id est precepta domini et legem ipsius, que sunt dulciora super mel et fauum. Sed impii parum uel nichil gustant, et, si aliquem inuitant impii, stercora boum, id est uerba immunda uel opera, ebrietates, gulositates apponunt, ita quod iusti quandoque corrumpuntur, quoniam corrumpunt bonos mores colloquia praua. Et plerosque in hoc mund[o] oportet uel inebriari, uel ingurgitari, uel aliquod peruersum facere, ne [aliquis] auarius habeatur, ut similis aliis efficiatur. Vnde Augustinus: Ego, ne uituperarer, uiciosior fiebam. Seneca: Cum hiis conuersare qui te meliorem facturi sunt; illos admitte quos tu potes facere meliores.


The Latin text of Odo shown here is taken from Léopold Hervieux, Les fabulistes latins depuis le siècle d'Auguste jusqu'à la. fin du Moyen-Age (1893-1899). There is a delightful English translation of Odo by John Jacobs, which is still in print. It's a lovely book!