Aesop's Fables: Walter of England
Fable 61. De capone et accipitre.
Perry
Querere diffugium, domino veniente, caponem
Audax accipiter dum videt, inquit ei:
"Quid fugis? Exsulta dominum cum cernis adesse,
Cuius in adventu plaudere nitor ego."
"Me," capo respondit, "Fratrum diversa meorum
Terret pena; tibi non timor ullus adest.
Nil magis horrendum quam flebilis aula tiranni,
Qua pietas omnis cum ratione perit.
Raptores famulique truces scelerumque ministri
Iniustis dominis impietate placent.
Qui sine vi, sine fraude manent, hi fraude necantur:
Nullo damnantur crimine sepe boni.
Sic fratres periere mei. Te reddit amicum
Impietas domino nequitieque vigor.
Hi proprias lavere stolas in sanguine; passos
Martirium, sepelit venter avarus eos.
Illius ergo timens adspectum credo latere
Tutius, ut morti me rapuisse queam."
Non amat insontes, sed sontes, aula tiranni:
Complacet iniusto raptor iniquus ero.
Text
as published in Boldrini, Sandro. Uomini e bestie: le favole
dell Aesopus latinus. Lecce: Argo, 1994. |
