<< Home Page | Walter Index

Aesop's Fables: Walter of England

Fable 39. De rustico et mustela.

Perry 293

Preda viri, predo murum mustela precatur:
"Da veniam, debes parcere, parce mihi.
Quod caret hoste domus, quod abest a sorde, fatetur
Esse meum, pro me te rogat, ergo fave.
Servitio me redde tuo, mihi redde laboris
Premia, pro dono sit mea vita mihi."
Ille refert: "Operum debetur gratia menti,
Non operi: gratum mens bona reddit opus.
Nemo, licet prosit, nisi vult prodesse, meretur:
Nam prodesse potest hostis obesse putans.
Cum mihi prodesses, mihi non prodesse volebas:
Hostibus ipsa meis et meus hostis eras;
Non mihi, monstra necans, sed eras tibi provida soli;
Sic panem poteras rodere sola meum.
Pane meo pinguis, mihi da pinguedinis usum:
Damnis penso necem; digna perire peri."
Nil honorat factum nisi facti sola voluntas:
Non operis fructum, sed noto mentis opus.