<< Home Page | Rom. Nil. Metricae Index

Aesop's Fables: Romuli Nilantis Fabulae Metricae

4. de cane et vervece (p. 656 in Hervieux; Perry 478)

Quisque rapax uti falsis en testibus obtat (sic).
Sic narrat nobis olim nunc sermo uetustus,
Quod sancte dirusque canis mendaxque bidenti
Dulcia gustiferi donauit munera panis.
Ecce canis poscit fallax sibi reddere panem.
Aurea mitis ouis uertens ad sidera iurat :
Neque, cruente ferox, aliut panemue dedisti
Velligero mihi uiuenti sine fraude nefanda.
Falsidicoque canis respondit corde cruentus :
Libica per stigei mentiris numina ditis.
Legiferum crebis adeunt tunc passibus unum.
Belligeris certant coram tunc iudice dictis;
Causidicus dixit fundens hec ore uenusto :
Quisue potest ueris uestri nunc testibus uti?
Tunc labrisque canis mordax fallacibus inquit :
Ast ego nunc testes binos uerosque reducam;
Ac lurcon duris presens cum faucibus instet,
Ac rostris miluus nunc ueris plumiger adsit.
Iustitiam amborum num cernis, arbiter inquit,
T(t)ristis ouis; dubitas illi cur reddere panem?
Cogitur en falsis binis tunc testibus, una
Namque, bidens sumptum pauperrima reddere donum;
Mollia de propriis contraxit uellera membris.
Non aliter potuit. Bruma intrat uiscera nuda,
Post et durifere contrusit frigore morti.
Consumunt carnem testes ac dentibus ossa.
Testaturque mali tali nunc ordine falsa,
Ut miseri rapiant munus uel corpore uitam.