<< Home Page | Rom. Nil. Metricae Index

Aesop's Fables: Romuli Nilantis Fabulae Metricae

33. de membris et ventre (p. 694 in Hervieux; Perry 130)

Nemo suos spernat reddens non dona referta.
Famosus labris infert nunc sermo uetustis,
Quod manus inuidie contorsit spicula uentri;
Sedula namque cibos tradebat more ministra,
Dulcia letifici impendens ac pocula bachi,
Delicias ueribus figit nunc frustaque pulpe,
Ac modo flammigeris uulcani torribus infert.
Sic epulas uentri dulces iam rite gerebat,
Cauponio prebens haustus nunc nectare musti,
Viscera iam uentris turgens ut crapula uexat.
Ast uenter manui uicibus post nilque ferebat,
Ac palme digiti persumunt munera nulla;
Intima set torpor regnauit regmine uentris,
Vtile neque gerunt torpentia moribus illa.
Tunc iduma esciferas epulas haustusque negare
Incepit, cessans torpenti reddere uentri,
Atque negant ilis pastus sic cetera membra.
Arida cum uenter sitiens ieiunia ferret,
Marcida corporeo lassant tunc membra uigore.
Visceribus fortis cunctis uis terrea cessit,
Ac macies miseras consorpsit pallida fibras,
Sedque rogat digitos pigros tunc uenter hianis,
Ad palmas necnon ac dicunt ilia cuncta :
Frugibus, o, caris nos aut nunc pascite pulpis,
Neptuni undisoni dulcis uel munere bachi.
Crux mordaxque famis carpsit nos dentibus, instat,
Ardentisque sitis flammans uis ignea torret.
Hec ollisque manus confert non prouida dicta,
Atque eadem digiti stolidi responsa dedere :
Nolumus esciferis dapibus plus uos saturare,
Pocula cunctigenis uobis uel reddere limphis.
Post phebus uicibus senis quam dempserit umbras
Flammiuomis ardens quadro set crinibus orbe,
Dirus, edax, ardor serpsit per corporis artus,
Flammigereque sitis uastant incendia cunctos.
Omnia tunc firmo soluuntur membra rigore;
Langescunt idume membris cum corporis ambe.
Incipiunt dire macie lasceque ueneno
Reddere tunc escas uentri iam pestibus esso;
Sed dura inluuies conclusit uiscera uentris..............
incomplete