Aesop's Fables and Other Parables: Odo of Cheriton
76. [DE AQUILA ET CUCULA].
Perry 626
Volucres quondam inuenerunt nidum ex rosis contextum et floribus aromatum.
Et dixit Aquil(l)a quod nidus ille daretur albi (sic pro aui) nobilissime.
Et facit conuocare volucres celi. Et quarebat ab eis omnibus audientibus
que esset auis nobilissima. Et respondit Cuculus: Kuk, kuk. Item quaerebat
Aquila que esset auis velocissima. Et respondit Cuculus: Kuk, kuk. Item
quaerebat que auis esset formosissima. Respondit Cuculus: Kuk, kuk. Et
quaerebat que esset auis melius cantans. Et respondit Cuculus: Kuk, kuk.
Cui Aquila indignata ait: Cucula infelix, te ipsam semper laudas, et ideo
summam condempnacionis contra te promitto, quod nec istum, nec alium nidum
umquam habebis. Vnde Cucula semper ponit oua sua in nido alterius auis.
Sic plerique semper se ipsos commendant, et opus suum exaltant. Nam
[si] queras a religiosis quis ordo sit melior, dicunt: Fratres minores;
Cistercienses monachi: Noster mleior; Praedicatores eciam; et sic de alijs,
qui omnes dicunt: Kuk, kuk, se ipsos laudantes. Sic eciam plures magistri
dicunt suas sententias et suos tractatus esse meliores. Et sic milites
et aliud quodcunque genus hominum semper cantant: Kuk, kuk. Sed iusti
et humiles semper se ipsos uilipendunt. Vnde Gregorius: Opera nostra per
meritum crescunt, cum apud nosmet ipsos per humilitatem decrescunt. Ita,
dum nostram gloriam quaerimus, placere ei, qui nos de celo conspicit,
non curamus. Job (31.27- 28): Osculatus sum manum meam in ore meo; que
e[s]t iniquitas maxima. Manum suam osculatur qui laudat quod operatur,
et hec est iniquitas maxima. Vnde Augustinus: Qui laudari ab hominibus
uult, is uituperante te non def(f)endetur, ab hominibus iudicante te non
eripietur, dampnante te non liberabitur. Item Augustinus: Quisquis enumerat
merita sua. Gregorius: Isti merita sua non uident que alijs uidenda praebent.
Idem: Inde mens dignior efficitur, vnde sibi indigna uidetur. Vnde eciam
Veritas nos instruit, dicens Luce (17.10): Cum feceritis omnia que praecepta
sunt uobis, (e)dicite: Serui inutiles sumus: quod debuimus facere, (non)
fecimus.
The
Latin text of Odo shown here is taken from Léopold Hervieux, Les fabulistes
latins depuis le siècle d'Auguste jusqu'à la. fin du Moyen-Age (1893-1899).
There is a delightful English translation of Odo by John Jacobs, which is still
in print. It's a lovely book!
|